Flokksstjórnarfundur Samfylkingarinnar var haldinn laugardaginn 27. mars kl: 13:00 á hótel Loftleiðum.

Fundinn sóttu þrír stjórnarmenn úr Þjóðareign - samtökum um auðlindir í almannaþágu, þeir Eiríkur Stefánsson, Lúðvík Kaaber og Þórður Már Jónsson. Þeir lögðu fram tillögu um að fram færi þjóðaratkvæðagreiðsla um fiskveiðistjórnkerfið á Íslandi. Eftirfarandi tillaga var samþykkt samhljóða.

1. Flokksstjórn Samfylkingarinnar styður hugmyndir Jóhönnu Sigurðardóttur, formanns Samfylkingarinnar, um að fram fari þjóðaratkvæðagreiðsla um íslenska fiskveiðistjórnkerfið.

2. Nýtt fiskveiðistjórnkerfi verði byggt á atvinnufrelsi og mannréttindi verði virt í samræmi við álit sem Mannréttindanefnd Sameinuðu þjóðanna sendi íslensku ríkisstjórninni í október 2007.

3. Tryggt verði í nýjum lögum að eðlilegur arður af fiskveiðiauðlindum Íslands verði nýttur í almannaþágu en ekki í þágu sérhagsmuna eins og hingað til.

Jóhanna Sigurðardóttir forsætisráðherra og formaður Samfylkingar ítrekaði fyrri yfirlýsingar sínar á fundinum þegar hún lýsti því yfir í ræðu sinni að hún telji það vera góða "leið til þess að útkljá áratuga deilur um innköllun aflaheimilda og endurúthlutun þeirra að láta kjósendur um að leiða málið til lykta í þjóðaratkvæðagreiðslu". Þá sagði Jóhanna í lokaorðum sínum á fundinum að möguleg þjóðaratkvæðagreiðsla gæti farið fram næsta haust samhliða þjóðaratkvæðagreiðslu um stjórnlagabreytingar.

Virðingarfyllst:

Framkvæmdaráð Þjóðareignar - Samtaka um auðlindir í almannaþágu.